Aktualitet

I vodhi kartën e bankës dhe para pacientit të shtruar te Infektivi, kush është infermierja e arrestuar sot

Policia e Tiranës ka arrestuar ditën e sotme infermierën që i vodhi portofolin pacientit të shtruar në spitalin Infektiv.

Burimet bëjnë me dije se bëhet fjalë për infermierën e spitalit Infektiv, Ronida Hysa, 30 vjeçe, banuese në Durrës, e cila ka vjedhur para nga portofoli i pacientit, si dhe ka marrë kartën e tij të bankës, duke i zhvatur dhe llogarinë bankare.

Kallëzimi u bë nga shtetasi F. D., 25 vjeç, djali i të ndjerit K.D, 60 vjeç, i shtruar te Infektivi, i cili ka deklaruar se nga llogaria bankare e të atit ishte tërhequr shuma 60.000 lekë.

Njoftimi i plotë i Policë:

Specialistët për Hetimin e Krimit në Komisariatin e Policisë Nr. 4, në bashkëpunim me Prokurorinë e Rrethit Gjyqësor Tiranë, kanë bërë të mundur identifikimin, lokalizimin dhe ndalimin e shtetases R. H., 30 vjeçe, banuese në Durrës.

Ndalimi i kësaj shtetaseje u bë pasi në bazë të pamjeve filmike rezulton si autorja e vjedhjes së një shume parash në portofolin e shtetasit K. D., i cili ka qenë i shtruar në spitalin infektiv, ku ka ndërruar jetë nga COVID-19.

Pas kallëzimit të bërë për këtë ngjarje, nga djali i të ndjerit, shtetasi F. D., 25 vjeç, i cili ka deklaruar se nga llogaria bankare e të atit ishte tërhequr shuma 60.000 lekë, specialistët për Hetimin e Krimit në Komisariatin e Policisë kanë organizuar punën për identifikimin e autorit.

Në bazë të provave filmike ka rezultuar se edhe shuma e parave është tërhequr nga shtetasja R. H., infermiere në spitalin infektiv, e cila ka pranuar autorësinë e ngjarjes.

Materialet procedurale do të referohen në Prokurorinë e Rrethit Gjygjësor Tiranë, për veprime hetimore të metejshme, për veprat “Vjedhja” dhe “Vjedhja duke shpërdoruar detyrën”.

Artikuj te ngjajshem

Shkruaj nje koment

Back to top button