AktualitetBota

Koka e trafikut të kokainës nga Amerika Latine, plane për transportin e saj me nëndetëse/ Kush është Ylli Didani, cila është pasuria që iu sekuestrua në Tiranë (Foto)

Policia e Shtetit në bashkëpunim me prokurorinë kanë vendosur në sekuestro preventive pasurinë e 44-vjeçarit shqiptar Ylli Didani, i cili është aktualisht i arrestuar në SHBA për llogari të DEA-s amerikane. Burime bëjnë me dije se pasuria e Didanit në Shqipëri kap shifrën e 1.2 milionë dollarëve.

Didani është arrestuar në SHBA nën akuzën e trafikut ndërkombëtar të kokainës. Ai u vu në pranga në 31 Mars të këtij viti në Karolinën e Veriut, pasi akuzohet për trafik droge, e kryer në bashkëpunim me disa persona të tjerë.

Sipas mediave amerikane Didani ishte udhëheqësi i organizatës ndërkombëtare të trafikut të drogës që ishte i lidhur me SH.B.A., Meksikën, Amerikën e Jugut dhe Evropën.

Ndër planet për shpërndarjen e kokainës ishte një nëndetëse – ose një dron nënujor. Didani dhe një person tjetër po mbikëqyrnin projektin e nëndetëses që do të përdorej për të transportuar sasi të mëdha kokaine në Evropë.

Njoftimi i policisë:

Vijon puna për gjurmimin, identifikimin dhe sekuestrimin e pasurive qe rrjedhin nga aktiviteti kriminal.

Finalizohet operacioni policor i koduar “Dërgesa”.

Operacioni i zhvilluar nga Seksioni për Hetimin e Pastrimit të Parave dhe Aseteve Kriminale në DVP Tiranë, nën drejtimin e Prokurorisë pranë Gjykatës së Shkallës së Parë Tiranë.

Vendoset sekuestro preventive mbi disa pasuri me vlerë rreth 1.200.000 dollarë, të cilat dyshohet se rrjedhin nga veprimtaria kriminale e subjektit.

Nga Seksioni për Hetimin e Pastrimit të Parave dhe Aseteve Kriminale në DVP Tiranë, në bashkëpunim me Prokurorinë e Rrethit Gjyqësor Tiranë, pas një hetimi disamujor, u bë i mundur finalizimi me sukses i operacionit të koduar “Dërgesa”, si rezultat i të cilit u bë ekzekutimi i vendimit të Gjykatës së Shkallës së Parë Tiranë, datë 26.04.2021, për vendosjen e sekuestros preventive ndaj pasurive të shtetasit Y. D., 44 vjeç, aktualisht i arrestuar nga autoritetet e DEA-s (antidroga) në SHBA, pasi është i akuzuar për trafik ndërkombëtar të lëndëve narkotike nga vendet e Amerikës Latine për në SHBA dhe Evropë.

Në zbatim të vendimit të Gjykatës u bë i mundur sekuestrimi i pasurive të luajtshme e të paluajtshme, vlera e të cilave shkon rreth 1.200.000 dollarë, konkretisht:

•Një njësi tregtare me vlerë të përafërt rreth 1 milion dollarë;

•Një shoqëri sh.p.k;

• 1 llogari bankare me vlerë rreth 206.000 dollarë.Nën drejtimin e Prokurorisë po vijon puna për të zbuluar asete të tjera që këta shtetas dhe familjarët e tyre mund t’i kenë regjistruar në emër të personave të tjerë.

Artikuj te ngjajshem

Shkruaj nje koment

Back to top button