Politike

Presidenti Meta zbardh takimin me ambasadoren amerikane

Në vijim të komunikimit të vazhdueshëm mbi ecurinë e fushatës zgjedhore, zhvillova dje një takim me Ambasadoren e SHBA, Sh.S.Znj.

Yuri Kim dhe sot me Ambasadorin e Delegacionit të BE, Sh.T.Z. Luigi Soreca, së bashku me Ambasadorët e vendeve anëtare të BE në Tiranë.

I falenderova Ambasadorët për angazhimin dhe interesin e tyre për zgjedhje të lira dhe të ndershme dhe vura në dukje rritjen e ndjeshme të numrit të rasteve të denoncuara nga qytetarët dhe partitë politike për parregullsitë e konstatuara gjatë kësaj fushate, krahasuar me zgjedhjet e kaluara.

Precedentët famëkeq të dosjeve të Shijakut dhe Dibrës kanë zgjuar aktivizmin dhe ndërgjegjësimin e qytetarëve për të mos lejuar deformimin e votës së lirë duke iu drejtuar në kohë dhe përmes provave, organeve të drejtësisë dhe atyre të zbatimit të ligjit.

Duke patur parasysh rëndësinë thelbësore, që kanë zgjedhjet e lira dhe të ndershme për të ardhmen europiane të Shqipërisë, theksova domosdoshmërinë e dekurajimit, në kohë, të çdo veprimi, që cënon integritetin e procesit dhe kërkova praninë e vëzhguesve ndërkombëtarë, veçanërisht në Qarqet e Durrësit, Elbasanit dhe të Vlorës, të trysnuara edhe në zgjedhjet e kaluara nga krimi i organizuar.

Veçova rëndësinë e jashtëzakonshme, që ka sjellja profesionale dhe vetëm sipas ligjit nga ana e Policisë së Shtetit dhe institucioneve gjyqësore. Vetëm reagimi proaktiv, i menjëhershëm dhe i pavarur ndaj çdo akti, që cenon paprekshmërinë e votës së lirë, mund të parandalojë përsëritjen dhe përhapjen e krimit zgjedhor.

Kushdo që provokon tension artificial, duke synuar dekurajimin e votimit masiv apo tjetërsimin e votës së qytetarëve, duhet të marrë përgjigjen e menjëhershme dhe të prerë të forcës së ligjit.

Shpreha besimin se pavarësisht problemeve të deritanishme, e diela do të jetë një ditë feste për të gjithë shqiptarët, pasi në këto zgjedhje ata do të kenë mundësinë e përzgjedhjes jo vetëm të alternativës më bindëse për secilin, por edhe të kandidatit që ata besojnë më shumë. 🇦🇱🇪🇺🇺🇸

Artikuj te ngjajshem

Shkruaj nje koment

Back to top button